咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
牛腩篇
香港特首俾隻狼贏咗，一心以為市民買樓上車容易啲，點知樓價竟然越升越有，最搞笑係隻狼每次出招，之後嘅樓價指數都係升，仲準過黃大仙。香港冇地咩？小弟每晚收工，乘坐公司車由將軍澳出旺角，都會途徑舊啟德機場，大大話話睇住一大片土地，空置咗好多年，最近一兩年先見麗晶花園附近開始起公屋。最搞笑當年仲計劃用啟德部份地方，興建一個綜合體育城，有大型足球兼田徑場，又有大型室內場館，仲成為申辦06年多哈亞運嘅計劃一部份，但申辦不成，家仲係荒蕪一片，最近仲有接近政府人士提議，不如體育城唔好起，留番嚟起樓好過。我唔知香港人嘅精神文明係唔係只得樓、樓、樓，放眼世界，各大城市嘅頂級場館都有地標性意義，好似巴塞隆拿嘅魯營、紐約嘅麥迪遜公園廣場，佢哋唔單只係一個比賽場地咁簡單，往往代表足球、籃球嘅聖地。就好似利物浦，佢哋擁有歷史悠久嘅晏菲路球場，小弟之前到英國遊覽，都有去過呢個紅軍聖地，無疑外觀上比較殘舊，但往往流露出光榮傳統。而紅軍最近亦決定，擴建晏菲路至6萬觀眾席，而不會另揀新場地。講開利物浦，上次本欄已講佢哋嘅年輕雙翼前途無限，結果上周六就由史達寧建功，1:0擊退雷丁，蘇索亦都同球隊續咗長約，兩個90後睇嚟都仲大把世界。更可喜係舒維爾、韋斯頓等年輕人都漸上位。我唔敢講紅軍係唔係重返爭標行列，但至少朝氣勃勃。文：牽牛