咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
咖喱篇
禮拜日尾場英超，昆士柏流浪（QPR）繼續開唔到齋，喺打多個嘅優勢下同愛華頓踢成1:1。QPR呢場波大好機會都贏唔到，全因為混亂嘅防守同埋領隊曉士保守嘅換人所致。QPR原本有個好開始，首先打開紀錄，但之後喺愛華頓嘅死球攻勢入面，佢哋竟然冇人跟實上嚟助攻嘅迪斯甸，結果俾佢頂中柱，反彈中門將施薩索拉斯入網。睇番個入波，愛華頓都唔係用啲咩高明嘅死球戰術，只係QPR突然失常，冇人看管迪斯甸。後防最講求默契，陣容最緊要穩定，但打咗8場英超，QPR已經用過4對唔同嘅中堅組合，今場曉士仲無端端收起安頓費迪南，用踢開防中嘅麥比亞同賴恩尼爾遜拍檔；佢兩個之前只係夾過一場，默契麻麻都係意料中事。本身QPR有大半條後防都係新加盟球員，已經好麻煩，但曉士仲不斷輪換後防，中堅組合好似星期美點咁場場轉，試問叫佢哋點培養默契！愛華頓嘅派拿喺60分鐘被逐，當時比數1:1同埋個勢都喺晒主場嘅QPR度，但曉士拖到71分鐘先換人，仲係前鋒換前鋒，將表現唔錯嘅森莫亞換走，換入施斯。曉士之後用奧奴夏入替左閘阿曼特查奧爾；到愛華頓連謝拉域都換走埋，諗住死守嗰陣，曉士竟然用安頓費迪南換入賴恩尼爾遜！兩個調動都係後防換後防，究竟曉士係咪想開齋㗎！成個胡禮菲臘斯喺度都唔試吓，換後防入去都唔知想做啲咩！QPR下半場贏唔到，關鍵真係曉士無厘頭嘅換人。文：咖喱