上周國際賽期，焦點都放在大國腳的世界盃外圍賽上；其實，明年舉行的U21歐洲國家盃亦完成了附加賽賽程，出線的8支決賽周隊伍，嘩！嚇死你！有西班牙、英格蘭、意大利、德國、荷蘭及俄羅斯！除主辦國以色列及挪威較有魚腩味，基本上都是黃金戲碼，肯定甚有睇頭！
單數年舉行更具睇頭
以往U21歐國盃受重視的程度不算高，原因之一是06年前都安排在雙數年舉行，例牌撞正歐洲國家盃或世界盃大賽，球迷目光被奪去之餘，還有大國腳爭人的問題，令小國腳往往未能派出最強陣容出戰，當然趕客。但自07年起，兩年一度的賽事轉為於單數年舉行，沒有大國腳賽事，小國腳隊隊打真軍，比賽水平大大提高。09年冠軍德國U21，便有近半隊成了一線世界級球星，如奧斯爾、基迪拉、曉姆斯、謝路美保定及門將紐亞等；去屆(2011)冠軍西班牙更不得了，曼聯門將迪基亞、巴塞的堤亞高艾簡達拿、車路士的桑馬達、拜仁的查維馬天尼斯，全部年紀輕輕已效力歐洲豪門。可見現今U21歐國盃星味十足，拍得住大國腳。最重要，正如前述，2013年決賽周湧現大量強隊，比起上屆充斥如白俄羅斯、冰島及烏克蘭等二線隊，肯定更有睇頭。這可能與眾強國對青訓的重視與訓練技術進步有關，如西班牙及德國便是表表者。香港球迷已慣了一年四季睇波無休，各地聯賽結束，睇歐聯決賽；到暑假又有國家盃賽事，執筆時尚未知2013年U21歐國盃直播權誰屬，不知到時會否掀起爭奪戰？文：方柏翹now足球評述員