鋼管舞？正喎，着住6吋高跟鞋兼好少布嘅靚女，喺條柱度擺來擺去，真係諗起都誘人。男人玩鋼管舞？唔係啩！可能我求大俠out啦，原來中國啱啱成立咗一支鋼管舞國家隊，7個代表隊中有兩名「柱男」，佢哋仲準備參加下月嘅世錦賽㖭。
港男怕醜唔敢參賽
上星期五舉行嘅香港鋼管舞錦標賽，「男子專業組」有6個男仔參加，強國佔咗兩席，其餘來自日本、南韓同大馬，香港一個代表都冇。賽事主席Jady（周碧瑤）都話：「香港男仔大部份都怕醜，學就會學，但唔敢喺人多地方比賽，怕影響自己嘅職業。其實歐美及澳洲呢啲鋼管舞較成熟嘅地區，佢哋學鋼管舞嘅男女比例係三七，就連中國、日本都好多男仔跳。」
都話強國勁㗎啦，佢哋啱啱喺天津成立咗一支鋼管舞國家隊，有閻少軒及劉岩兩個「柱男」、5個「柱女」包括依繁、谷薇、劉寧、宋瑤和曹諾，佢哋仲話會喺下月8至10號，去瑞士參加世界錦標賽。5個「柱女」之中有個叫谷薇，本身係幼稚園教師嘅佢，早前參加《中國麗人》節目大跳鋼管舞爆紅。至於「柱男」方面，聽Jady講，好多都係赤膊或者see through上陣，然後隨住自選音樂喺條鋼管做高難度動作，究竟男人跳得好睇，定係女人跳得靚啲，大家自行判斷嘞。
不過，唔好以為呢班「柱男」冇出色，遲下成為奧運代表，贏到金牌就真係一鋪翻本。事關鋼管舞正爭取將來成為奧運項目，唔係講假，之前一班鋼管舞倡導者曾經申請過成為今年倫敦奧運嘅測試項目，就知道鋼管舞喺歐美真係幾hit㗎；只可惜因為佢哋各地有唔同嘅計分方法，最後先至被倫奧拒絕咗。
知多啲：鋼管舞男剛起步
鋼管舞近年成為有氧運動嘅新勢力，歐、美、澳洲喺05年開始舉辦女子鋼管舞錦標賽，男子組賽事最近亦開始普及。今年第2屆舉行嘅香港錦標賽，賽事主席Jady亦係香港首間鋼管舞學校（Pole Divas）董事，該校於04年成立，學生超過1,000人；而學費由每小時$260（初級）至$300（高級）不等。