輸咗竟然係贏？呢個道理，相信唐唐最清楚，睇佢可以喺特首選舉後周遊列國，仲同太太郭妤淺重拾恩愛，真係恨死民望插水嘅狼振英咯。唐唐兩公婆噚日又拍住拖出席一個慈善晚會，原來唔只換咗哈利波特眼鏡嘅唐唐肥咗，八方發現連唐太都圓潤咗喎，睇嚟佢哋家嘅生活真係好疏乎喎。雖然唐唐任影唔嬲，唔介意向人大晒同太太有幾恩愛，但就吝嗇開腔，唔評論特區施政，令等佢再爆金句嘅八方大失所望。好彩，同太太郭秀萍赴會嘅合和實業主席胡應湘繼續暢所欲言。
哥頓點醒狼振英
當哥頓被問到政府係咪要叫停啟德體育城、用塊地嚟起樓時，佢即時話未必，仲用手指住個腦，不點名叫狼振英「你可以用吓腦筋，睇吓邊度有地方（建屋）」。噚日唔少賓客同老婆現身，郭炳湘卻單拖赴會，點解咁孤單呀？