【本報訊】香港樓價天天破頂，窮人則越住越細，劏房呎租貴過山頂豪宅，門口卻窄得連一張舒適床褥都放不進去。自稱屋邨仔、由細窮到大的舞台技術員黃偉政，從90呎公屋出發，誓要設計出窮人版「變形金剛屋」，以有限預算創造舒適居所，讓窮人能住得舒適。 記者：吳淑義
家具店擺放的六呎大床、豪華梳化、特大衣櫃甚為誘人，但百萬窮人蝸居卻只有數十呎，29歲的阿政居於屯門的單人公屋，「全屋6呎半乘13呎半，計埋唔夠90平方呎，我肯定個設計師冇住過公屋，根本唔知窮人需要」。那個「修長」的家，廚廁佔了近半面積，剩下空間放了小床就容不下梳化，枱凳當然免問，門口只有2.4呎闊，許多組合家具都進不了，「我仲有好多朋友住劏房，最窄嗰個門口只闊1.5呎，個人要打側入屋，裏面連凳都冇張」。
兩萬蚊買齊用料
創意在狹縫滋生，阿政想出「變形金剛屋」計劃，「概念係受設計師張智強（Gary Chang）啟發，佢以變形嘅『箱宅』屋聞名全世界，但佢間屋有300幾呎，用靚料改裝要用好多錢，一般人負擔唔到。我想用少少錢做一個山寨版，一、兩萬蚊已經可以買齊全屋用料，逐件買返去慢慢砌，每件都可以上到巴士，運返屋企都要識慳錢，可以話係窮人恩物」。
阿政想以自己的家作為示範單位，變形家具的組件能進入只有呎許闊的門口，組裝完成之後，開合之間可以變出舒適的床、枱、凳及各式家具，「例如我做緊一組變形床，合埋晒可以瞓得好舒服，打開就變成舒適嘅梳化，下面仲有空間收納雜物，仲有電掣可以幫手機叉電，家居可以簡單又舒服」。
變形屋的設計，原來跟成長經歷有關，阿正從小父母離異，跟姑媽居於公屋，「六個人住300幾呎，冇任何私人空間」。在無人管教下，阿政小時候流連街頭學壞，中四被記過及踢出校。其後到大一設計學院讀時裝設計，卻因家境貧困沒錢做畢業展，成績不理想及英文不好而無法入行，只好轉做車房打工，卻學會力學結構知識，打下設計基礎。
