大批網民噚日去咗光復上水行動，但最終冇乜網民、水貨客大戰場面，反而有民建聯「梁粉」劉國勳落去抽水視察，主動獻身俾網民圍剿。八方見劉國勳除咗帶埋老婆踩場，身後仲企咗一位皮膚白白、身穿低胸短裙長靴、濃妝艷抹嘅疑似強國佳麗。望真啲，原來係亞視前女主播洪綺敏。冇見一排，洪小姐娘味重咗之餘，身形仲有少少發福㖭。
烈日下皺眉齋企
八方記得洪綺敏鍾意將自拍照放上網，但印象中都係走清純路線；就算以前做女主播，或者幫狼英選特首，衣着都較為端莊，估唔到家咁重口味，鍾意強國佳麗look。洪綺敏噚日唔知係嚟幫狼英收風、定係純粹路過湊熱鬧呢，不過可能當時太曬啦，記者出身嘅佢全程企喺側邊皺晒眉，一副唔耐煩嘅表情。佢幫完狼振英選特首之後，佢冇加入新政府，不過就去咗香港中國商會做公關。