如果有睇電影《春嬌與志明》嘅觀眾，應該會記得演楊千嬅好姊妹嘅Isabel（陳逸寧），佢經典一句「腿張開」笑爆全場。今年32歲，現職保險經紀嘅Isabel終於結婚啦！佢噚日將鑽石婚戒照片放上Instagram，跟住佢啲好友就係咁恭喜佢。
撻着保險同事
噚日馮仁昭打電話恭喜Isabel，佢竟然有啲怕醜話：「係呀！你哋消息好靈通，男朋友都係啱啱同我求完婚。」佢嘅未婚夫係佢嘅保險公司同事，兩個人拍拖已經有一段時間。
Isabel話婚期暫定喺出年，等擇好日子先會公告天下，問到幾時影婚紗相？佢話：「安排緊，答應嫁人之後，人生好似進入咗 另一個階段，好開心，我同男朋友都拍咗拖一段時間，感情穩定，所以佢同我求婚，我咪答應囉！導演彭浩翔頭先都有打嚟恭喜我，將來如果有機會，我都希望可以繼續演戲。」
