正當大家講緊內地人花費開始冇咁豪，名錶百達翡麗（Patek Philippe）內地第二間分店今個星期喺上海開業，總裁Thierry Stern接受《華爾街日報》訪問，估計內地人對名貴手錶嘅需求係經得起時間考驗咁話。
十八大窒礙銷情？
市場今年一直有個講法，指中共十八大會議前，新領導層班子未開估，大家都唔會送禮住，免得送錯禮，所以，煙酒、名錶、貴袋嘅銷情全部受影響。瑞士手錶出口上個月就錄得三年以來首次下跌（以價值計），中國同香港分別跌28%同20%。
百達翡麗就依然睇好中國市場，上海分店前身係英國領事館，地段一流，主要展示10萬至150萬人仔嘅貴錶。Stern認為，中國人對於過百萬名錶嘅興趣始終會返來，而且越貴越罕有越受歡迎。
咁大家不防留意吓下個月十八大之後，奢侈品銷情會唔會全線反彈喇。