雨傘平至二十元也有一把，但今時今日仍有人不嫌煩，不怕人見笑，拿去給人修理。修傘的人，也不計較數十元，只要你的傘有情，他願意邊聽故事，邊把斷了的骨一支一支接駁好，讓這把雨傘，繼續延續一個又一個動人的故事。 記者：周燕 攝影：林栢鈞、黃子偉
垃圾遮下的愛情
深水埗有間雨傘店，只要雨傘有情，老闆分文不收也願意修理。
「曾經有對老夫妻帶嚟一把又舊又爛嘅遮，我一睇就話：『婆婆，整唔到呀，太舊喇，無晒啱用嘅材料。』旁邊丈夫幫口話：『呢把遮出現嗰陣，佢當年先得十八歲，我仲追緊佢。』」「新藝城雨傘店」邱老闆惟有盡力而為，對方付錢，他分毫不收，老夫婦就買了糕餅答謝。今時今日買一把雨傘，平至二十元有交易，而修理雨傘的工錢再便宜也要二三十元，但這世界總有惜物之人，三番四次左修右補。別以為老人家才念舊，邱老闆的客仔不乏年輕人，「有個後生仔拎把垃圾遮嚟舖頭，我哋稱呢啲價值廿蚊雞、質量差嘅遮叫垃圾遮，即係銀行同化妝品公司贈送嗰類貨色。我勸佢：『唔使整，買把新啦！』」對方還是堅持，「修理一條骨要廿蚊，我打開遮，有四條骨要修理，即係八十蚊。」後生仔取雨傘時十分開心，邱老闆後來知道自己做了一件好事，「原來佢剛剛失戀，嗰把遮，佢同女朋友一齊撐過。」
邱老闆隨手取來一把米奇老鼠雨傘，打開一看，折斷了的骨已經修理好，「呢把遮都有故事，有個老太太拎嚟畀我修理，話係個女送畀佢嘅禮物，當時我做唔切，惟有搵老師傅修理。我唔收錢，但老師傅要開飯嘛，老太太一聽到要收錢，就寧願掉咗佢。」後來他在垃圾桶見到這把雨傘，一時心動，又把它修理好，一直放在店舖希望她有日會取回，「希望保留到老太太呢份回憶嘛，但佢硬係唔嚟。」他做生意不是下下講錢，但非所有客人都懂欣賞，甚至覺得奉旨免費，他曾接受電視台訪問，報道一出街，一天有八十把雨傘待他修理，三天，小小店舖就多了二百多把雨傘，應付不來請老行尊幫手，所以要收工錢，「修好把遮，有人感恩，有人好晦氣：『又話唔使錢？』」仲嫌三嫌四，不滿老師傅手工。」
自誇手藝天下第一
連客人的回憶都想修好的人，自然本身也重情念舊。
這間舖頭仔不甚起眼，跟旁邊的街坊小店沒甚麼分別，最搶眼是招牌寫上「新藝城清道光二十二年創」。1842年，邱家在廣州開設一間小型百貨店，後來中共建國，他們逃來香港。邱老闆的父親在深水埗經營一個檔仔，依然賣生活百貨，來到他一代，有了舖頭仔就轉為單賣雨傘，兼重用「新藝城」這個名字，「唔想賣咁多種類貨品，搞到自己煩晒！賣遮好在無貨尾。假如有一日清貨結業，一定很快散貨，因為只要平就有人買。」他做生意很坦白：「客人總係鍾意輕巧嘅遮，我搵把輕身嘅遮畀佢，佢又問耐唔耐用，我就會話輕身一定唔耐用。輕身嘅遮多數用鋁骨做，鋁係乜？睇汽水罐就知道，汽水罐好易爛！我賣嘅遮有靚有曳，邊可能又平又靚？食飯都係燒肉飯、燒鵝飯貴啲，燒鴨飯平啲啦。」
「修遮唔使點學，眼見工夫而已，整整吓就曉，但要有藝術頭腦先整得靚。」他對自己手藝充滿自信，「好似呢把遮，骨架經過幾次修理，然後先到我手，如果比賽的話，我一定第一，你睇，上手修理得幾難睇？」他不只修理雨傘的手藝好，還有一定的藝術天份，店舖內外都放有他用傘骨、廢紙做的鷹、蜻蜓、魚仔甚至巨型白紋伊蚊作品；門口另有一台「裝置藝術」，由盆栽和雨傘等組成，十分有趣，加上他一臉鬍子，笑容可掬，令「新藝城」三字在深水埗無人不識。
（深水埗荔枝角道314號B1舖/9248 5748）
雨傘是浪漫產品
賣雨傘的人喜歡雨傘，劉太賣了十多年雨傘，家中有六十把雨傘，人家出門襯衣服手袋，她跟女兒得配搭多一項東西─雨傘。
「我年輕嗰陣已經好鍾意買遮，行街見到鍾意嘅，就忍唔住會買。」她經營的「嘉欣屋」專賣傘及雨具，坊間少見的款式都可以在店內找到。說情侶傘，你可能以為是兩把款式差不多的雨傘，劉太卻取出一把比一般雨傘大三分一的迷彩傘，原來所謂的情侶傘傘面較大，兩人同用也不怕淋濕半邊身，「阿媽揹住仔女也可以撐。」又有另外一把雨傘，顏色深沉，平平無奇，打開來才發現玄機所在，原來內裏有個小風扇，擋陽光之餘又可以吹一吹風凉一凉快，「最適合行山人士！」又有些雨傘，傘面用兩層布接合而成，生出幾個洞，「呢種設計能夠起防風作用，風打落傘面都唔怕吹斷骨，好適合打風嗰陣用。」
劉太賣雨傘又喜歡雨傘，大把心得，她說，雨傘多數採用一種叫Pongee的快乾布和滌倫布做成，前者價錢較貴質地較柔軟，整體質素也較佳；傘骨則大約分為五類，即鐵線、鋁、鋼、纖維及碳纖維，其中以鐵線為最平貨色，「十蚊、十五蚊都有交易。」不過質素也較差。她也懂得修雨傘，難忘雨傘主人不是因為慳錢而修理，多是因為舊雨傘有情，載有結婚紀念日、生日、拍拖等回憶，「雨傘最與別不同嘅地方係，佢係一種浪漫嘅貨品。」
（地址：鰂魚涌英皇道933號地下6號舖/2121 1032）