【本報訊】近10年從未表示過需要集資的思捷環球（330），周一突然宣佈供股，震驚市場。市場人士預期，思捷今日股價將會受壓，料股價跌至約11元水平會有支持，建議有意購入的投資者要「睇定啲」，更不建議參與供股。 記者：陳健文
康宏證券及資產管理董事黃敏碩，並不建議投資者供股。他說：「以思捷家個基本因素嚟睇，我覺得供唔過……理據好簡單，思捷嘅問題都未解決晒，等遲啲業務出現轉機，到時再買都未遲，冇理由喺仲未見到曙光嘅時候增持。」
至於今日思捷股價，他預期不會跌太多。他說：「一定唔會跌到8元，用番ADR個價嚟睇，應該喺大約11蚊嘅水平有支持。」周二在美股時段，思捷美國上市預託證券（ADR）折算價曾較周一香港收市價跌約23%，折合約9.53元。
專家：追貨要睇定啲
訊匯證券行政總裁沈振盈亦認為，由於以藍籌來說二供一屬大比例供股，思捷今日股價難逃一跌，投資者不宜草率決定會否供股及急於「追貨」。他說：「我都估大約喺11元水平會有支持，但應該唔會有恐慌性拋售，因為家仲揸思捷嘅投資者，應該唔係普通投資者。」
若沒有持有的投資者，應否伺機購入思捷「博反彈」及藉取得供股權以便日後可「炒一轉」？沈振盈建議大家可以遲些才作決定。他說︰「今日先係宣佈供股之後第一個交易日，睇埋股價走勢，再睇埋其他股東嘅態度都未遲。」
基金：$10樓下諗得過
專家意見是「供唔過」，但有外資基金經理不諱言，若今日思捷「跌得深」，他會買入兼供股。他說：「若跌到10蚊樓下真係諗得過喎，你睇下佢家啲大股東係乜水？陰謀論咁諗，無啦啦嚟供股，我買佢哋供完股有後着……又或者咁講，佢哋可能就係想用大比例供股嚟令到其他股東唔供，等佢哋可以增持。」
現時思捷單一最大股東為對冲基金Lone Pine Capital，持有約14.17%股份，集團非執董Friedrich Jurgen Alfred Rudolf持有約6.81%。近月不停密吸思捷股份的中南証券及海通國際（665），總持倉量則已達1.78%及7.66%。
網民洗版：思捷供股
Leon Chan
52億點用？派地產租金、派給上級管理層、派護盤基金經理，間公司零售情況差到用錢都救唔番。
Leon Chan
沽爆佢！
問咁多做乜
持貨者焗供「鳥」。
Cheung Tat Ming
呢隻股真係害死人，30蚊跌落20蚊，20蚊再跌到去12蚊左右橫行咗兩個月，唔少老散買貨博撈底，點知一樣話供股價8元。
問咁多做乜
「cap」水時間，趁市旺。
資料來源：《蘋果日報》及香港討論區留言區