陳可辛前晚7點幾拖住囡囡陳是知喺銅鑼灣街頭出現，本來兩父女行街好溫馨，不過6歲嘅囡囡突然扁晒嘴想喊，嚴父上身嘅陳可辛同囡囡講：「一陣自己同媽咪解釋。」之後佢哋上咗一棟商業大廈，裏面有好多playgroup，相信陳可辛應該帶囡囡去上堂。
喊完即好番
過咗一陣之後，夜麻麻都戴黑超嘅吳君如出現，佢上咗商業大廈會合陳可辛兩父女，之後一家三口離開，囡囡本來上咗保母車，都俾君如捉番落車，喺車內嘅工人姐姐都即刻落埋車，陳可辛捉實囡囡手仔，最初是知乖乖咁企喺度聽媽咪訓話，其後見到是知好激動咁擺手，猛咁擰頭，仲好大聲咁喊住講：「我唔敢啦，媽咪唔好。」
君如見囡囡知錯，即刻原諒佢話：「好，唔可以再咁。」一場街頭教女戲終於落幕，一家三口溫馨咁拖實去開平道嘅da Domenico意大利餐廳開餐，食到舔舔脷嘅是知終於笑番。
採訪、攝影：陳辰、楊浩賢、朱志聰
