「九龍塘大地主」余彭年，年屆九旬，做善事不遺餘力，最為人津津樂道當然係佢08年宣佈，捐出李小龍金巴倫道故居畀政府保育，件事冇進展，但同李小龍故居同一條街，同樣屬於余彭年嘅一幅雙連屋地，近日就以3.6億沽出。
成本485萬 升值73倍
聽聞買家有內地資金背景。余彭年分別喺72年同85年，合共以485萬買呢兩幅地，一直收租，最後以3.6億沽出，等於升值73倍，認真驚人。唔知余彭年套現所得係咪用來做善事呢？
呢位來自湖南嘅慈善家，五十年代植根香港，靠炒股炒樓發達；佢曾經講過，香港地咁細，地皮最值錢，於是身體力行，七十年代開始掃地皮，喺九龍塘擁有多幅貴重地皮，包括李小龍故居，可惜改為李小龍紀念館單嘢，因政府同城規會唔接受挖三層地庫做展覽館而暫時打住，因而未有下文。