意大利拉奎拉市09年4月發生6.3級大地震，導致逾300人死亡，噚日當地法院宣佈，多個意大利地震專家被判監六年，理由係佢哋當時未能夠準確預測地震發生，以致當地居民疏於防範，令慘劇發生。由天災變成人禍嘅先例一開，相信專家們以後事無大小都預警先，最後變成「狼來了」，慘劇依舊發生。如果同樣情況套用喺香港股市同樓市，班財演以後會點樣講股呢？至於第一批要入冊嘅，一定係嗰班成日話樓市有風險嘅特區膠官囉。
講番股市，港滙強到冇朋友，金管局終於要向銀行體系注資，滿足市場對港元需求。熱錢滿天飛，恒指周一拗腰倒升，殘股更加係炒到癲，今年由高位怒插七成嘅熔盛重工（1101），急彈15%，全年冇運行嘅光伏股好似保利協鑫（3800）同卡姆丹克（712）亦蠢動。大價股方面，港機（044）近排明顯有資金追捧，股價突破5月嘅橫行區，戰友可候回試110元買入，短線博升一成。
唐牛