西九鼠王芬早前當選立法會司法及法律事務委員會主席後，網民即刻整咗個「梁美芬騎呢事件簿」為佢贈「㷫」。但佢嘅騎呢實錄，真係數之不盡，最新一例唔單止騎呢，仲有出賣長者之嫌。
過橋抽板惹民憤
話說政府企硬喺特惠生果金寸步不讓，堅持要設資產審查，「榮升」立法會超級保皇黨嘅經民聯表明支持；而鼠王芬係經民聯一員，有網民話佢最終點投票，大家心中有數啦。事實卻係鼠王芬選立法會時，其中一款單張寫明，當選後會爭取特惠生果金免審查，點知一當選就過橋抽板，又難怪激起民憤。網民近日就將佢嗰張傳單改圖，加上「出賣長者可恥」、「大話精」等字眼，提醒西九選民，有人違反競選承諾。