羅致光護航:全民退保不急

羅致光護航:全民退保不急

【本報訊】一直支持須資產申報、盡快通過「長者生活津貼」的扶貧委員會籌備小組成員認為,全民退保研究需時,政黨現時阻撓津貼通過、逼政府交出退保方案的做法「過份」。

指猶如討論政改

現時的爭論處境,羅致光將之比喻為討論政改方案,「政治上嘅討價還價我明,用爭取全民退休保障作為籌碼,但你點知道可以逼到幾多佢(政府)先會畀你?可能一拍兩散㗎喎」。
羅致光表示,全民退休保障多年來沒共識,即使回歸前港督彭定康提出的方案亦無法過關,「講咗40年都傾唔掂,當年由政府提出都唔過,如果有人覺得可以喺一兩年之內推出一個大家都接受嘅方案,係樂觀得好誇張」。
羅致光續指:「政府點可以寫包單拍板畀個乜(全民退保)方案你呢?歷史上知道有問題㗎嘛,當要討論兩年,到實行又要等多四年,咁中間你想唔想做啲嘢?家on the table(枱面上供討論)有個方案,當然我哋可以永遠推翻佢再嚟過啦。」

不認同設追溯期

羅認為,即使長者生活津貼「不倫不類」,仍應盡快通過,幫補30至40萬名長者,「長者生活津貼從任何角度睇,都唔係一個好方案,但呢樣嘢喺制度上唔使做好大手腳,2,200蚊係無妨,但一定要有申報,唔係就會太多變數,我唔排除一路傾唔掂(全民退保),(長者生活津貼)變咗做一個長遠方案,呢個財政承擔唔係一年半載」。
談到追溯期,他感氣憤,「家討論個上限,直情係修修補補、街巿講價,我都未見過可以有追溯期」。