立法會福利事務委員會噚日討論特惠生果金，泛民議員要求政府將10月1日定為追溯期，同勞工及福利局局長張建宗鬧到面紅耳熱，局長斷言拒絕，話要去信長者，又要提升電腦系統，唔夠時間做喎。點知民建聯立法會新丁梁志祥發言時突然爆肚，話既然政府喺技術上咁難做，不如乜都唔好做，「完全唔計資產，剩係計年齡，咁咪快囉」。唔知梁志祥天真定真心，但贏得唔少議員同觀眾席市民掌聲，之後長毛梁國雄仲幫口揶揄張建宗，「冇審查咪快囉」，梁志祥聽見仲笑晒口豎起拇指讚好。不過梁志祥之後咪一樣舉手反對審批撥款嘅動議，話咁快就現形。