法國係文化人發夢天堂，法國有美酒美食美女美景，文化氣息濃厚，大量中世紀建築物保存得乾乾淨淨，名畫古董不缺，最緊要嘅就係一星期工作三十五小時，準時放工，下晝三點後就可以放軟手腳，每年八月必定放假，真係諗吓諗吓都想學法文學到陶傑咁掂，馬上移民法國。
小孩子又高興喎，現在滿腦子社會主義思想嘅奧朗德總統話要教育改革，改革重點之一係廢除家課，學生功課要在學校做完，放學回家就有時間玩到夠。唔准帶功課回家做，理由係：因學生家境不同，富裕學生在家可能有電腦、電子輔導，甚至家庭教師教做功課，與清貧學生相比，佔盡優勢，並不公平。法國人最講公平，故此學生家課要廢除。
奧朗德有條件搞三角戀愛，佢嘅「拍拿」女友有條件陷入六角戀，男女關係搞不清，唔知啲清貧男女又覺得公唔公平呢？或者法國男女全無「盛男盛女」之別，不分貧富，人人有三角四角關係，咁又唔同。但學生不准做家課，不准帶功課回家，又真的對清貧學生公平？冇咁簡單啩？有錢人一樣可以請補習老師在家催谷功課嘅唧，到咗考大學之時，你話做得功課多嘅學生佔優吖，還是只在學校做功課，回家無功課嘅基層學生有着數？到考試成績公佈，前者可能排隊進入索邦，考入精英中之精英嘅國家經濟學院之類，窮學生咪又係排隊尾？唔通屆時又立法規定精英學院一定要按比例、不理成績，錄取基層學生咩！法國表面上好公平，其實「經濟學人」統計過，無論是保守右派執政抑或還是社會主義左派上台，啲總統、總理、內閣、部長人選嘅絕大部份都來自法國大學制度稱之為Grandes Écoles（高等院校），法國企業嘅CEO、CFO亦然，入呢啲學校之前，學生要讀兩年預科班，課程與內容深度都難過一般中學畢業生，平時做少啲功課，讀少啲書都入唔到。精英尖子入高等院校，普通學生咪入大學就算囉。高等院校畢業生又最有機會考入國家管理學院ENA（奧朗德母校）及同類嘅經濟/管理學院，以後平步青雲。政治人物當自己係精英中之精英，常常擺出一副公平面孔，究其實，係父母官心態，將其他人視為老百姓，要自己關心照顧而已！