《尖沙嘴》
港姐出身嘅陳法蓉同蔡少芬、洪欣一向感情都好好，情同姊妹，所以前日十月生日嘅壽星女陳法蓉同洪欣就相約喺尖沙嘴搞咗個生日會。前日下晝5點半鐘左右，見到陳法蓉揸住佢架Benz吉甫車離開沙田寓所，佢先去到山林道上咗一幢大廈，逗留咗30分鐘之後就去咗海運大廈，泊好車之後就行咗去Cova餐廳買咗個蛋糕。
十月星辰慶生
陳法蓉攞住個蛋糕行咗去附近嘅一間薄餅店，原來洪欣同囝囝張浩鋒（前名莫鎬廉）、蔡少芬一家三口、佢哋嘅助手若蘭同兩個小朋友，已經喺度等緊。陳法蓉坐低冇耐就開始叫嘢食，成班可能好耐冇見，一直雞啄唔斷咁傾偈，蔡少芬老公張晉就變咗湊仔公，佢個女楚兒就越大越靚，啱啱出世就成個男仔，家卒之似番媽咪又靚又cute，影相時又識得望鏡頭。
洪欣囝囝都有番咁上下大個，佢好識自己照顧自己。餐飯食咗成兩個鐘，到最後陳法蓉就拎個蛋糕出嚟慶祝，唔講唔覺佢過埋生日都成45歲，洪欣就後生少少都41歲。佢哋搵咗餐廳嘅侍應生幫手影相，鬼死咁開心。臨走張晉仲捉咗個女每人送個goodbye kiss，唔知在座唯一單身嘅陳法蓉會唔會心動恨結婚生仔呢？
採訪：黃曉程、吳耀輝
攝影：楊浩賢、朱志聰
