岑建勳同陳淑莊被指秘密拍拖，雖然「勳莊」都唔認，但有讀者就「咬住唔放」，噚日就向八方提供一張兩人喺上月底喺中環太子大廈地庫西餐廳撐枱腳食晚飯嘅絕密照片，仲話佢哋經常約會，亦都係呢間餐廳嘅常客。相中所見，兩人喺一張四人枱有講有笑，表現輕鬆。八方再搵Tanya求證，Tanya承認，佢同岑建勳唔止一次單對單食飯，因為兩人都係好朋友，飯局上講民主、講文化藝術。咁大家最關心你哋兩個有冇發展機會喎！Tanya就咁回應：「家一定唔係，將來就冇人知。」佢話，岑建勳至今冇向佢表白，雙方只係好朋友，總之都係嗰句：「多謝大家關心。」