咩叫單天保至尊，喺西甲以往就不離巴塞隆拿嘅美斯同皇家馬德里嘅基斯坦奴朗拿度（C朗）；不過今季就用嚟形容法卡奧就更加貼切，周日西甲尾場，法卡奧就喺90分鐘射入靚罰球，助馬體會1:0擊敗皇家蘇斯達，取得聯賽7連勝。26歲嘅法卡奧今季嘅風頭，簡直可以直逼美斯同C朗，周日西甲聯賽，馬體會面對皇蘇嘅嚴密防守，入波機會真係唔多，阿祖安盧比斯、馬里奧蘇亞雷斯等遠射，都威脅不大；比賽踏入89分幾鐘，眼見就快和波完場，法卡奧就成為馬體會救星。當時客軍有個離門約30米嘅罰球，法卡奧巧妙咁彎過人牆直飛死角入網，就憑呢個金球幫馬體會攞3分。
連續10場入波貢獻16球
法卡奧嘅威勢，只係輸少少畀美斯㗎咋，佢除咗西甲開鑼戰作客利雲特冇波入，連續10場佢有份踢嘅比賽，都有波入，累積達16球；球隊亦都全部贏波，最威風梗係歐超盃對車路士一場入3球，又幫哥倫比亞世界盃外圍賽3連勝；而佢亦都累積9個入球，同C朗並列西甲神射手次席，落後美斯2球咋。法卡奧大勇，亦幫馬體會起飛，7連勝後，馬體會以22分同巴塞並列榜首，亦都係球會自91/92球季後，再一次聯賽7連勝。馬體會教練施蒙尼梗係錫晒法卡奧，大讚佢咁話：「法卡奧平時練波已經成日練習射罰球，今次佢終於展示努力嘅成果。」
油王出6.1億撬上「車」
講真，法卡奧又有頭槌，左右腳射術又勁，連罰球呢一瓣都有埋，仲26歲處當打之期，又點會唔吸引頂級球會招手。英超榜首嘅車路士就對佢好有興趣，「油王」班主阿巴莫域治出到6,000萬歐元（約6.1億港元），要明年1月將法卡奧帶到倫敦；馬體會其實負債都唔少，連費蘭度托利斯、阿古路都肯賣，法卡奧越入波，佢留隊嘅機會就越細。不過據聞馬體會都作好準備，如果法卡奧離隊，就準備收購曼聯失去正選嘅墨西哥前鋒查維亞靴南迪斯。
法卡奧今季威水史
‧1）自8月27日對畢爾包起計，法卡奧參與的10場比賽，不單10場全勝，他亦每場都有建功，並累計16個入球。‧2）法卡奧連續3場世盃外都有建功，哥倫比亞亦取得3連勝，分組賽升上第3位。‧3）車路士若成功以6,000萬歐元（約6.1億港元）收購法卡奧，法卡奧將成為英超第2貴前鋒，僅次於前馬體會射手費蘭度托利斯。