隔牆有耳：Dream Bear夏蕙姨粵曲籌款撐保釣 - 李八方

Dream Bear劉夢熊為保釣一向仆心仆命，今次就諗到靠做大戲去撐保釣，拉攏咗香江粵娛粵劇團、良朋曲藝會合辦「愛國愛心籌款粵曲演唱會」，11月17日夜晚7點15分，喺北角新光戲院大劇場上演，所有收益會捐畀保釣行動委員會。
保釣大戲嘅票價分1,000、500、300、200同100蚊，據講反應好好，家只剩番200同100蚊飛，長者仲有半價。今次演唱會有10幾位名伶演出，不過八方有眼不識泰山，淨係識得夏蕙姨。

委員會預計最少籌到50幾萬，Dream Bear就拍心口話一對一，籌到幾多佢就捐幾多，「齊心一意撐保釣」咁話喎。保釣行動委員會主席德哥話，啟豐二號暫時冇嘢要整，兩側俾日方船隻撞到歪晒嘅欄杆就一定唔整，話晒都係歷史印記。