或許自狼英上場後，政治氣候變幻無常，刺激咗政界人士一啲既有嘅行為模式。本港政壇最近掀起一股先鬧翻，再friend番嘅和解風。繼卿卿同富富前日嘅「世紀擁抱」後，重返行政會議嘅新民黨葉劉「姐姐」一入狼門，噚日就即同佢嘅「死對頭」林鄭「妹妹」共晉咗一場世紀午宴，想彼此一餐泯恩仇。「姐姐」飯後喺fb發相，認晒低威；反觀「妹妹」飯後粒聲唔出，一改以往愛用官媒發鱔相嘅作風，睇嚟唔想俾人知呢餐存在過。睇番兩張食飯相，喺餐桌上見葉劉露出勝利笑意，林鄭就強顏微笑；之後換個場地，喺沙發坐低飲茶，葉劉蹺起雙腳氣定神閒，林鄭則木口木臉，一睇張相就高下立見。葉劉呢幾年不斷向林鄭發炮，有分析話係葉劉想擊敗林鄭做政務司長。當林鄭做CS後，葉劉講明唔會做佢下屬，「你叫我返去跟個妹妹（林鄭），我真係老面皮放唔落囉」。葉劉年前又強攻強拍條例，批評林鄭強搶民產，明益地產商；月前更加炮轟林鄭喺國教一役，為保民望用眼淚博同情。
葉劉：同入行會冇關
葉劉話呢次係佢首次一對一同林鄭食飯，強調喺選舉前已經約好咗，同佢入行會冇關。飯後葉劉仲留言話：「今天很高興，我的舊同事，現任政務司司長林鄭月娥邀請我到她的官邸共晉午餐，餸菜都是家常便飯，大家共同渡過溫馨的一小時。」葉劉強調，佢同林鄭冇芥蒂，仲認衰話自己以前批評林鄭係講大咗，但都係礙於自己嘅議員身份，對事不對人，真係信不信由你！mailto:[email protected]