民建聯最出名嘅係「蛇、齋、餅、糭」，不過有「遊戲黃」之稱嘅黃容根最為人津津樂道嘅，肯定係佢議員辦事處搞畀街坊參加嘅遊戲比賽。根叔「響朵」之作係前年搞嘅「『根Dum』 VS Gundam Next Plus」高達遊戲機比賽，之後多次舉辦嘅「遊戲卡同樂日」同「爆旋陀螺對戰」亦反應不俗。最近根叔再創新猷，突破平面推出「現實版Angry Bird」，喺佢太和辦事處出面擺放巨型丫叉，每日下晝3點至6點畀街坊用憤怒鳥公仔大過手癮。不過個丫叉對正banner上面根叔個樣，好多唔妥「禮義廉」嘅網友都話，似係打佢多過打啲豬喎。各位有興趣嘅朋友不妨去玩吓，但聽日先好去，因為今日公眾假期憤怒鳥要休息。