熱錢四圍搵食，兼且相當短癮，但基金追貨，首選當然係揀番「舊愛」，魏力上周五推介億和控股（838），股價低位橫行多月後現突破，高見8毫，漲近一成；埋單亦升4%，報0.76元，相信升勢未完。
市況回暖，新股有驚喜，新利控股（1240）掛牌飆四成，加上復星醫藥（2196）招股，資金開始發掘低殘的半新股。中國城市軌道交通（8240）以下限價1蚊上市，但都冇人吼，掛牌5個月以來一直潛水。不過睇真啲，公司主攻鐵路通訊系統，概念十足，上半年業績更相當亮麗，純利8072萬銀，按年飆升99%，表現比唔少主板股更佳。如業績保持理想，明年有機申請轉主板！
中國城軌主要為北京市地鐵、列車等提供IT系統及基建服務，例如為客戶設計地鐵訊息控制、自動售票及交通指揮等系統。北京市營地鐵目前共15條，較08年翻近一番，估計到2015年，市內地鐵總長度將由440公里增至708公里，總造價約1600至1800億元，以設備系統佔45%計，總投資高達800億元，只要集團能分佔10%，已相當和味！上周集團中標一項1.1億元人仔的標書，佔去年收入逾五成，來年盈利添憧憬。現價0.93元，PE約7倍，以招股價上限1.23元為目標，博賺32%。
魏力
http://www.facebook.com/2012jason