楊千嬅今年6月為老公丁子高生下慈姑椗丁進諾（Torres）後，她便深居簡出湊B，瘦身後的她後日會產後首度復出，出席代言活動。千嬅日前接受商台訪問，講到乖仔即不停口，又讚老公穩重了不少，肯幫她分擔湊B工作。千嬅更說，在五人團隊協助下，她已減去約40磅。
楊千嬅和丁子高的囝囝Torres已四個多月大，千嬅日前接受商台節目《1圈圈》錄音訪問，並於今明兩天播出，千嬅於訪問中談到自己產後的心態，問到對囝囝的期望，她說：「希望佢有承擔。」還會再生嗎？她說：「隨緣，唔抗拒，但我覺得身體未恢復。希望有呢個福氣，可以再做媽媽。」
千嬅指囝囝已會轉身和認人，問囝囝的特質像父母哪方面？她說：「佢聰明似我，但佢social似我老公，知道對住乜嘢人笑。」千嬅形容湊仔如初戀：「會做盡儍事，有種戀愛嘅感覺，成日跟佢講佢啲話，講一個鐘，勁儍，如果出面有個第三者，一定以為我有精神病。」
認情緒波動
問丁子高做爸爸後可有改變？千嬅說：「佢穩重咗好多。生完第一個月，我情緒好波動，我掃唔到風，丁生幫手，冲凉都係佢，佢好識湊BB。」
為餵人奶，千嬅不敢減肥，至一個月前才開始keep fit，她說：「生嗰時重咗57磅，應該減咗30至40磅，相信家仲有10幾磅。減肥由餐單開始，坐月時食得好清淡，我嘅team有五個人，有陪月姨姨、營養師、教練、中醫等，會做氣功，令身體機能好啲，新陳代謝好啲，自然會瘦。」
談到抱仔導致手部骨膜炎，千嬅說：「因為當時個肚好大，起身落床用手支撐身體，有時用錯力，搞到好嚴重。產後隻手幾痛都自己做，但每次見到個仔飲奶就唔痛。」
陀B搵命博
養子方知父母恩，楊千嬅說：「有咗BB後，包容程度大咗，原來唔係我人生最緊要，家庭有BB、老公同父母，佢哋都好重要。我擔心個仔嗰時，諗起當年我媽媽都好辛苦。生完個仔，我已開始諗，將來佢娶個乜老婆，婆媳都唔知點算。」
談到當日陀仔拍電影《低俗喜劇》，千嬅說：「接拍時懷孕三個月都未夠，導演彭浩翔又唔知我乜事，拍拍吓我去洗手間，發覺唔對路，即刻去醫院，我經理人先同佢講，佢勁驚。係收3,000萬票房，但我搵條命博㗎。」
撰文：黃曉妍
