民建聯楊祥利早前因為破產而喪失區議員資格，所屬嘅沙田鞍泰選區下月4日進行補選。今次補選最矚目梗係民主黨同前戰友新民主同盟對決啦。噚日民主黨游月華舉行造勢大會，該黨全部立法會議員都嚟撐場，原本陣勢幾好，不過代表新同盟出選嘅陳珮明有心打對台，連同范國威、司馬文等重量級人馬企正喺民主黨造勢場地對面，民主黨一叫「支持游月華」，佢哋就回一句「支持陳珮明」，結果得個嘈字，八方在場其實咩都聽唔到，只係聞到濃濃火藥味。游月華話立法會選舉時，民主黨喺鞍泰區有1,220票，新同盟得343票，如果唔想個位畀番民建聯，泛民支持者應該棄保；新同盟老大范國威話陳珮明喺呢區做咗兩年工夫，游只係空降，棄都係棄鴿喎。