聯交所上周四披露謝玲玲今個月15號喺場外增持寶源控股（692），持股量超過5%，去到8.69%因而曝光，中環友以為呢位謝玲玲係麗新系老闆林建岳前妻，點知原來係美麗的誤會，林建岳前妻冇諗住殺入財經版。
真正美麗的誤會
林建岳前妻謝玲玲真名叫做謝正陸，佢見到咁多報紙話佢入股寶源，應該係唔想俾人抽水，好認真咁搵律師寫信畀寶源，澄清自己唔係嗰位謝玲玲，即係一場誤會啦。
不過真正入股寶源嗰位謝玲玲都好厲害，上周一場外增持，公司周四晚就宣佈以6000萬代價買入中山一間木製家居產品公司，呢間公司今年先開業，頭八個月賺千零萬，加埋市場當日以為林建岳前妻入股，刺激寶源股價周五升17%。
寶源收晒市夜晚7點半先出通告幫林建岳前妻澄清，睇嚟股價今日先見真章。