政壇中嘅男女關係，有時好比娛樂圈咁撲朔迷離，就好似阿鄭小班鄭家富同瞓街卿劉慧卿咁，上個禮拜先至因為政改嘅立場，喺DBC電台直播室鬧翻，富富當時仲激到卿卿彈起，令卿卿喺節目途中拎埋手袋拂袖而去。
但係，佢哋話晒都喺96年一齊瞓過街抗爭過，又點會有隔夜仇？噚日喺政總廣場嘅撐DBC集會，富富就為咗香港嘅前途，同卿卿「箍煲」，故意遲啲先走人，等卿卿上台時，向佢情深一抱，實行撐言論自由，一攬泯恩仇。
卿卿最初都好似有啲驚奇㗎，見佢Ｏ晒嘴咁，但好快就受落晒，同富富開開心心嚟張合照。咁又係，卿卿連向工聯會群眾揮手都接受到，同富富抱抱又有乜所謂？