朱慧敏喺05年同梁榮忠因車震而搞到聲名大噪，今年初佢同EO2成員彭懷安（Eddie）撻着，雖然朱慧敏一直唔肯承認戀情，但佢哋不時俾人撞破拍拖煙靭。好似前晚咁，朱慧敏又同Eddie拍拖去九龍城買餸返愛巢打邊爐，認真sweet到震。
拍住拖買餸
前晚7點半，記者喺九龍城福佬村道撞見朱慧敏同Eddie，佢兩個啱啱喺一間牛肉專門店行出嚟，之後齊齊上咗Eddie部Honda。原來佢哋order咗牛肉，但唔想企喺舖頭裏面等咁揚，所以就一齊上番車等。大概幾分鐘之後，Eddie再落車畀錢同攞牛肉，然後由Eddie揸車返去佢哋將軍澳清水灣半島愛巢。
唔知佢哋係咪好心急返歸開餐，Eddie竟然有停車場唔泊，就咁將部車泊喺大廈門口。跟住兩個人挽住一袋二袋好似係打邊爐嘅食物返上樓，睇嚟準備大滾特滾。
採訪、攝影：朱志聰、吳耀輝
