女人幾百年練出的智慧，差點俾兩女毀於一旦，第一個叫蔣麗芸，議會大聲無問題，有理據叫你做「鐵娘子」，鬧到唔知自己鬧乜咪變咗「潑婦」；另一位毛玉萍，訂到Hermès袋不忘在微博晒命，咗仲死雞撐飯蓋，話無數烈士鮮血才有強大民族。國民教育冇教你乜嘢係《國旗法》？癲少陣得唔得？兩位究竟識唔識「藏拙」？
呢班女人口出狂言，當佢未受過良好教育，但愛馬仕小姐（事關藝術總監Pascale Mussard係女人）過百年的英名，睇怕為咗個「紅旗包」一朝喪，Samantha要同Birkin說再見了。品牌為咗賺強國人錢不惜搞臭個朵，不過總有品牌有番啲志氣地希望賺番洋人錢。
阿爺不停話要企業走出去，離不開財雄勢大的國企，但凡事都有例外，好似波司登（3998）近年積極發展非羽絨業務，先喺倫敦買物業設總部開旗艦店，家又傾緊英國百貨店銷售特許權，準備同意大利品牌合作，希望落地米蘭，提升品味，趕走娘味，可趁入冬炒一轉。
Samantha
本欄逢周一、三、五刊出