南方航空（1055）今年以來跌5%，大幅跑輸H指7.5%升幅，絕對有力後來居上。南航半年盈利插水85%，成為股價致命傷，但睇真啲，滙兌收益由舊年賺12.4億銀（人民幣．下同），變成今年蝕3.1億銀，如果只計經營利潤，其實僅倒退三成；由於南航收入以人仔計，債務則大部份美元計，所以人仔弱勢，業績就冇運行，但人仔近期已重拾升軌兼屢創新高，下半年成績表肯定省鏡。
其次，南航阿媽已發動增持攻勢，並承諾未來12個月有增無減，雖然只限A股，但H股有望水漲船高。現時南航H股較A股折讓14%，但整體H股已和A股接近平水，南航仲可以炒埋差價收窄。
南航股價近期沿10日線拾級而上，短線動力十足，並逼近250日線（3.77元），一旦升穿，便可確認中線轉勢，相信突破只是時間問題，現價3.74元買入，升穿3.90元可再加一注，先以今年高位4.31元作目標，潛在升幅15%，中線睇5字頭。
唐牛