盛女陳淑莊未能成功連任立法會議員，近日竟然被娛樂周刊踢爆佢原來情場得意，而新任男友竟然就係已年屆60、經歷幾次婚姻失敗嘅岑建勳。不過Tanya話絕對冇呢件事，強調家吓自己仍然係單身。各位想向Tanya展開追求嘅王老五，你哋仲係有機㗎，不妨同潮州怒漢拗吓手瓜。Tanya話，佢同岑建勳前日見到呢段趣聞都係「得啖笑」，最多只可以講，岑建勳係泛民，符合佢嘅擇偶條件之一，但並唔代表佢就係真命天子。盛女莊講明，冇普選係唔會結婚，未來四年目標唔係「爭仔」，而係「爭普選」。有周刊前日登咗Tanya同岑建勳一齊去睇騷嘅相，話兩人已秘密拍拖。Tanya話，嗰晚其實係成大班人去睇達明一派嘅騷，包括岑建勳、余若薇同佢老公、何秀蘭同埋助理，絕對唔係兩個人拖手仔去睇騷咁話。雖然上晒周刊封面，但陳淑莊強調呢段煲水新聞唔係真，盛女仲係盛女，家吓佢仲未有拖拍。唔使做議員呢四年係咪會有啲咩目標先？「目標？我目標就係普選囉﹗」佢又話，如今生活樂得清閒，除咗同朋友食飯、睇書、寫文外，嚟緊會計劃再開talk show。
年齡絕對唔係問題
咁佢對未來一半有咩要求呢？Tanya強調年齡絕對唔係問題，細過佢、大過佢都係no problem，「最梗要係夾。」點夾先，Tanya話，男友一定要同佢理念一致，價值觀有少許差別都好難一齊，所以只有男性泛民先有機會同佢拍拖。如果係建制派，無論幾有錢幾靚仔幾大隻，一樣都係no way。mailto:[email protected]