2013/14年學年嘅中一收生，只需2班26人就可以免「死」，避過殺校之劫，條件的確十分寬鬆。講得難聽啲，一間中學打開大門收來中一新生，26個都收唔到嘅話，既然已受家長放棄，何不「光榮結業」，免得眼冤？對香港嚟講，好過叫英皇皇仁縮班嚟遷就吖。根據最佳市場分配原理，如果到咗2016/17年中一學生只有54,100個嘅話，以每班25人（幾適中吖）嚟計，可開2164班，香港有五百間中學已經足夠（一啲名氣中學可收生多啲），其他可淘汰。
不過全世界教師行業皆有工會保護，殺校永遠係政治事件，一個月前奧巴馬大本營芝加哥市嘅教師連續罷課兩三日，為的就是爭取加薪與職位安全（即係不准輕易裁員），芝加哥市政府為免影響奧巴馬競選連任，好快就讓步啦。故此吳克儉局長都好識做，推出中一收生2班26人嘅殺校底線，等教協教聯唔好砌佢，算係幾醒目。
學生減少，又有中英文中學之分，帶來之最大collateral damage（連帶傷害）就係教科書出版商，你話出版一本中一科學課本，假設市面上可能有六本書，平分市場嘅話，每本頂多賣得八九千本，但要分開中文版或英文版，攤算之下，全無規模經濟效益，單位固定成本甚高（吳局長係銀行界HR高手，識計呢啲數啩），零售價格怎麼可能便宜？教科書出版呢行，睇嚟增長希望甚微，已成夕陽工業，新出版商要打入呢個市場，需要極大勇氣及腫脹荷包！新人不入，舊人逐漸萎縮，乃係教科書出版業大形勢，消委會不懂市場，只懂罵行業壟斷，罵多幾年，呢行真係會變成「自然壟斷」。梁振英先生在立法會（十月十七日）發言力指「積極不干預」，「大市場小政府」已不合今日香港需要，特區政府須適度有為！唔，到時會唔會「有為地」由政府以打破「書商壟斷」之名，「適度干預市場」，推出官辦教科書呀？官方出版教科書，恐怖過推行國民教育多多聲，家長組織唔知有冇諗過呢？