中國際賽咒：阿仙奴
有唔少人講，英超其實幾好賭，因為數據算幾穩定，起碼唔似英冠咁爛路。當然賠率開得狠，選材都要講值博率；熱到阿仙奴，國際賽回歸後，主力狀況未明，仍要作客諾域治，得1.4倍左右，真係冇乜可能作為重心注。冇乜好評，全隊都差，先收起阿歷士張伯倫，得隻儍翼謝雲奴，差起上嚟真係100萬鎊都唔值，破唔到對手密集；3大國腳辛迪卡索拉、基奧特同普多斯基，明顯國際賽後未回氣。周三返主場鬥史浩克04踢歐聯，對番啲防守冇咁壓迫嘅歐洲隊，表現會唔同款；單W分頭會提升不少，咁先稍為合胃口。
主場硬淨：韋斯咸、富咸
講故仔，人人可以動聽；一場足球比賽嘅成敗，千絲萬縷，唔係三言兩語可以用陰謀論說清。評述阿仙奴對諾域治嗰位專業評述員，話收到料，好多英超隊到60分鐘後先會撳掣；因為好多波士賭咗呢瓣盤口，計勝負只係計餘下30分鐘，所以嗰陣時先會變陣打真軍，真係得啖笑。如果係咁，難怪噚日雲格面黑黑；如果係咁，噚日兩隊倫敦二線隊主場王，應該名利雙收。富咸完場前破悶局，大路賽果，不奇；韋斯咸大炒修頓，也不奇，兩勝方今屆主場成績已躋身前5。韋咸實而不華，賽事運作大致如賽前估計，奇在修頓領隊先收起列基林拔，喺60分鐘後先換入場搏殺，但隊波嗰陣時已落後兩球。想嘜死安祖卡路爾?結果佢今次只係負責衝散對手防線，韋斯咸真正殺手，好易估，一直係大儍最愛嘅路蘭。呢位大隊長，今場腳風同上次鬥阿奴，截然不同。
真係好爛：英冠
從來都係混亂，季初前領者，慢慢墮落，尤其兩支前景未明球隊。黑池今場「夫添」，作客仍1球敗走般尼，相信同領隊荷路威同恩斯仔有異心有關；周二快車迎森林，個人給予佢哋短線投注嘅最後機會。白禮頓也甩轆，布力般嘅印度班主可能情傾舒活，但熱刺唔放人，冇帥下，持續不勝。大混戰下，其實賠率比英超好分得多，賭冷門，呢個聯賽周二快車期勿錯過，明天《英倫心聲》再談。蘋果波神