盧海鵬前晚又「試咪」，他與汪明荃、廖偉雄等在鴨脷洲出席長者盆菜晚宴時，提到在無綫拍劇的日子便一肚火，發炮狂轟TVB要老人家日等夜等，每日死細胞，拍劇又辛苦，忍不住爆粗說：「好鬼辛苦，X家鏟吖！」
盧海鵬是老戲骨，入行多年，今年終於憑《奪命金》首奪金像獎最佳男配角獎，鵬哥在電影上有好成績，前晚他與汪明荃、廖偉雄和吳麗珠等在鴨脷洲出席「萬歲同歡慶金秋2012長者盆菜晚宴」，問他會否重返無綫拍劇？他決絕地說：「唔好，驚捱壞，實捱壞㗎！我年紀大嘛，入去時乜都應承、乜都話好，但整整吓好似琴姐（李香琴）咁。」
「成日等咪衰囉」
琴姐近年與無綫續約，但早前因血壓高在家中跌倒，被迫考慮退休，鵬哥不平則鳴說：「成日等咪衰囉，有時等到尾都係摸和（冇工開），啲細胞日日死啲，咁就死㗎喇。我就唔會死啦，我唔會等㗎，咁咪撈得長啲囉。」提起最近無綫在深宵時段重播他有份演出的《施公奇案》，鵬哥越講越勞氣，更爆粗說：「拍嗰套好鬼辛苦，朝朝同Bobby（歐陽震華）拍外景，X家鏟吖！」
城電告急不關事
鵬哥透露最近忙拍電影《超級經理人》及幫王維基拍劇，問可擔心政府不發免費電視牌予城電，以及有指城電最近告急，引發逃亡潮，問鵬哥可會擔心？他說：「唔關我事，家自由身，拍咗可以賣埠，但人工硬要畀。」廖偉雄則謂無意復出拍劇，只想專心搞好有機食品生意。
此外，阿姐前晚深受長者及街坊歡迎，阿姐被熱情氣氛感染，安歌多唱一首歌。阿姐透露今年是她入行45周年，12月22日至31日在新光舉行十場演唱會，問可會加場？她說：「我係第一個人喺新光開演唱會，都要睇反應。」屆時會展出相片及部份獎座、演唱會歌衫等珍貴紀念品。
採訪、攝影：黃曉妍
