港股過去兩周累升逾500點，配合熱錢剛湧至，是否「心癢癢」想追貨？「細價股揀股王」瑞信董事兼亞洲（不包括日本）中小型證券研究部主管劉紹文認為，投資者對中國經濟的看法已轉好，這一次「殘股大翻身」的反彈僅剛開始，仍有機會「升埋兩季」，首選與內需相關的基建、資源及消費股，切記避開出口股。記者：陳健文、吳綺慧
劉紹文接受訪問時說：「我睇好原因好簡單，就係大家對中國經濟、企業盈利嘅預期已經夠低，當8同9月份經營狀況有少少改善，並預期今、明兩季經營狀況唔會再差落去，就已經足夠令股價跌咗咁多嘅公司，出現一個大幅度反彈。」
大家尚記得今次2、3月業績期前曾炒過一轉「junk rally」（垃圾反彈，意指升幅很快打回原形），但歷時一個月左右即無以為繼。劉紹文認為今次情況有別，因這次反彈是有基本因素支持，並非純粹靠「放水」來催谷，故力度會較強。
生意有改善 開始補貨
「今年初好多中小型股份無緣無故都升20、30%，但之後公佈業績，就即刻見光死。不過今次唔同，做中國生意嘅公司開始有補貨（re-stocking）情況，即係終端需求有起色。若果我最樂觀嘅假設成立，即生意可以持續改善到明年第一季，根據過往經驗，喺呢種『轉角市』，好多殘股都可以升到一倍，50%升幅已經係最低消費。」
如何判斷中國經濟有起色，除了評估宏觀數據，劉紹文形容他尚有一盞「股海明燈」──從事最上游化工原料製造的最大廠家建滔化工（148）。「根據往績，建滔嘅經營數據一直係leading indicator（領先指標），生意往往喺經濟轉勢前跑先兩、三個月，建滔管理層透露，8月開始定單同比轉為有增長，到9、10月升勢都keep到，更令我確信市場正在re-stocking，並且主要係來自中國嘅需求。」
首選內需基建水泥股
不過劉紹文強調，他並不認為是次「轉角市」，是代表中國經濟已重回結構性增長的軌道，很可能只是一個維持到一、兩季的顯著反彈，「要有一個結構性嘅經濟轉勢，講緊係要以年計，今次唔係呢個case。長線睇，我哋仍處於長期企業盈利嘅下降軌道，但當中會有up and down，呢次反彈由於股價夠殘，upside已經好吸引。」
看好板塊方面，他指必須揀與內地需求相關股份，首選基建、水泥及上游資源類股份，而消費股中亦有不少可撈底選擇，如體育服裝股；相反，未來兩季做美國及出口生意的公司，如裕元（551）及利豐（494）等則會跑輸，估值長期高昂的股份亦應避開。