叫大家估吓邊隊今季NBA季前熱身賽頭5場輸晒，大家一般都會估近季都衰開嘅山貓，或者係星散嘅太陽；但勢估唔到，簽入尼殊同懷特侯活嘅湖人，上周五竟然主場都輸畀帝王，熱身賽頭5場全輸；連「超人」都要急急復出，周日再鬥帝王，睇吓幫唔到幫湖人開齋？（now678台周一9:30am直播）
失誤多 熱身賽全輸
雖然熱身賽一般都係畀NBA球隊練吓兵，等新舊球員有磨合機會，勝負都睇得幾輕，但堂堂湖人竟然5連敗，真係好難接受。上周五賭城拉斯維加斯對帝王，湖人已經冇之前4場咁揸流攤，大前鋒加素已經復出，仲打咗31分鐘，兩大後場主力尼殊同拜恩，都各上陣29同28分鐘，基本上除咗超人外，湖人主力已經悉數登場，結果都係以98:103輸畀帝王，熱身賽5連敗，亦係聯盟唯一熱身賽不勝之師。
湖人繼續高失誤嘅問題，全場多達18次失誤，老波骨尼殊都竟然都有4次；加素賽後都講：「我哋咁多新球員，最緊要都係傳球方面，各人都有無私、做正確選擇，而且要限制失誤數字。」
侯活料復出明鬥帝王
不過湖人5連敗，對手更加只係帝王、爵士之流，又點唔到教練米克布朗擔心，超人今次就復出救湖人嘞。周日湖人會係賭城背靠背對帝王，「超人中鋒」懷特侯活為湖人地標戰嘅呼聲越嚟越高；今夏接受背部手術嘅懷特侯活就講：「我都好想盡快復出，至少幫湖人打1場熱身賽。」米克布朗就講：「懷特侯活仲喺每日觀察名單，佢打唔打得，都係等軍醫開綠燈。」
不過美國雅虎就言之鑿鑿，懷特侯活將會周日處子為湖人上陣！