過去一周冇乜睇波,反而聽咗好多人講東講西,講來講去的唔係你呃我,就係我呃你嘅嘢。到紅館一遊諗住睇吓黃子華點樣幫香港人減壓,點知場都未開就睇咗一段佢響廁所入面爆阿叔門嘅短片,減壓不成反而睇完仲躁咗;有啲替阿叔不值,屙尿射錯隔籬呢啲意外不時都有喇,使乜咁㷫啫;反而少見嘅係竟然真係有fans會應子華要求將銀包拋上台,末日就來了,銀包錢財事少,攬攬偶像事大,貼埋錢俾你呃都冇所謂。上網睇完美斯老點班烏拉圭後衞跳高晒,然後射地波入罰球之後,又去TED學吓嘢,睇到一段講每個人面對現在的我、同未來的我嘅爭鬥。個個都想未來的我好,但話事嘅永遠係家嘅我,所以用啲方法欺騙自己家陣就要搏命。講者為咗迫自己每日寫5版稿,就定咗規矩每次做唔到就要罰自己5蚊,有肉痛嘅感覺之下隻手就乖乖就範寫字嘞,為咗日後嘅自己過得好啲,惟有搵家嘅自己老襯。再睇另一段TED,一位心理學家研究人嘅肢體動作會唔會影響心理狀況,即係通常呢贏波先會舉高雙手慶祝㗎,咁若果調轉嚟,未跑之前好似保特咁做個射箭動作的話,會唔會跑得快啲呢?佢嘅調查結論係會,挺起胸膛去面試嘅人不但畀對方正面啲嘅印象,亦直接加強自己嘅信心,呢種由外而內再由內而外嘅心法,球場上最佳人辦莫過於C朗,邊有人射波前仲chok過入波後㗎,心理學家話呢個心法背後其實可以話呃自己去呃人,不過呃得多自己就會入戲,入戲之後就可以當成真嘞。TED昨日來了香港,響TED X Kowloon個活動入面,最深刻印象嘅講者係一位前局長朱福強,留住二撇雞嘅佢一上台好嚴肅咁講話個topic好反高潮,唔唱好香港不特止,反而係想揭穿政府冇檔案法嘅弊端,俾我哋知道如果繼續隨便銷毀歷史檔案的話,隨咗唔知前特首買咗幾多魚糧餵金魚之外,香港日後亦會冇晒記憶,咁就邊個講大話都冇人知嘞。耳邊嘅《重口味》已經播到第7次,呢個全新嘅譚校長特別版,Eason比校長更加譚詠麟,是為本周最fake的懷舊金曲,令人更懷念那些講大話會甩大牙的好日子。文:keymannow TV主持mailto:[email protected]