在緋聞方面深得老竇成龍真傳的房祖名，早前被爆與內地新人葉熙祺閃婚，事後葉否認婚訊但默認戀情，但轉頭祖名直斥是炒作新聞，自稱一直單身未有女友。葉熙祺前晚委屈說：「邊個講大話應該係人都知，我要講嘅已經講晒，我自己都係受害者。」
內地新人葉熙祺被傳與房祖名閃婚，前晚她在中環出席電影《天生愛情狂》宣傳活動，被追問與房祖名的婚事，她說：「我好想講不如你哋問佢喇，我都好想知講大話嘅人係點。」問她究竟指邊個講大話，她說：「邊個講大話應該係人都知，我要講嘅已經講晒，我自己都係受害者，我覺得自己俾人咁樣屈，再加上之前有啲新聞對我生活有好大影響，結婚呢啲唔會隨便講，影響好大，我自己冇介意，但係冇諗過係雙重傷害。」
「我係受害者」
問葉熙祺所指的雙重傷害是甚麼？她說：「其實感情冇話邊個啱邊個唔啱，我出道以嚟都未試過有緋聞，呢次係我第一次面對，我都束手無策，我覺得自己係受害者之餘，仲要俾身邊嘅人傷害，因此而長大咗好多。」問她是否與祖名仍然拍拖兼聯絡？她說：「你哋問佢喇，我唔知講乜好，我都答唔到，我之前係講實話，但係唔知會惹嚟人哋咁嬲嘅反應，我真係驚咗。」最後她只說：「原來娛樂圈有好多嘢唔可以太誠實，咁樣會好受傷。」
成龍昨現身屯門，祖名被傳閃婚，他說：「你哋咁都信？」問他是否認識葉熙祺？他想了一會說：「唔識。」至於葉指原來講真心話也會受傷害，他說：「由佢喇！」
採訪：何慧斯、胡比
攝影：仇志德
