隨着「人仔」升值，來港購物變相「買平咗、着數啲」，內地人湧港掃貨盛況可期，屆時除奶粉、尿片及益力多外，個人護理用品等亦成為內地人血拼目標。有商人窺準商機，在深圳大開港貨店，乘着滙率賺取差價，以布心花園東湖路一帶為例，已開了四間儼如小型超市的港貨專賣店。
奶粉藥物一應俱全
記者走進其中一間剛開業半個月的港貨店「港華」，在200呎的小店內，港貨尿片、化妝品及藥物一應俱全，而放在最當眼處的奶粉，牌子多、貨量足，比香港超巿還要齊全。「奶粉最好賣，因為內地人對國內產品欠缺信心。」老闆娘李小姐坦言，深圳港貨店越開越多，店主全是內地人，每星期會派人到香港買貨兩次。她一周前才以每罐300港元的價錢，購入10罐美贊臣奶粉，按當時的滙率82計算（即100港元兌82人民幣），每罐奶粉要246元人民幣；但若以最新滙率79.8計，只需239元人民幣，每罐買入價平了7元人民幣。當得知「人仔破八」後，她即時致電貨主大量入貨，「個個都爭住入港貨，最受大陸人追捧嘅奶粉，供應都唔係咁穩定，求過於供，實會加價喇！」惟李小姐預料這個蜜月期不會太長。《蘋果》記者