《喜》─噚日係世界壁球日，對呢位26歲嘅前香港壁球「1哥」劉少維（Dick、右）嚟講，係佢大婚囍日，同拍拖3年嘅女友Sardonna共諧連理！
一對新人喺紅磡一酒店天台舉行婚禮，喺無敵維港海景襯托之下，兩人好sweet咁講聲：「我願意！」然後筵開16席，港隊總教練蔡玉坤、「小旋風」趙詠賢同現任「1哥」李浩賢都有到場。09年11月Dick邂逅Sardonna，當時臨近香港東亞運，佢曾經擔心拍拖會影響成績，有諗過放棄表白，最終當然冇咁做啦，而且仲喺東亞運狂掃3金㖭。
Sardonna就讚老公夠細心之外，比賽嗰陣嘅眼神非常迷人，至於幾時生愛情結晶，呢對新婚夫婦就話會順其自然，我求大俠都祝佢哋百年好合！