身邊的朋友同事，對強逼金近乎放棄，大部份人對下個月可以轉會，心態消極，「係咁㗎啦，可以點呀，我都預咗冇啦！」原則上，股榮非常唔同意佢哋咁悲觀嘅諗法，但無聊計計數，發現佢哋所言非虛。政府1999年推出強逼金以來，一直強調以小滾大，到65歲退休無憂。但過去12年經驗話畀我哋知，你臨老齋靠份強逼金，好肯定講，你唔使旨意退休。強逼金成立至今平均年率化內部回報2.7%，所謂滾雪球效應其實只是數字遊戲。假如25歲開始出嚟打工，每月賺到兩萬，連同僱主部份，每年供會2.4萬，每年回報3厘，到65歲，累積供款96萬，屆時可滾到185萬。65歲的185萬，家聽落唔錯，其實計埋通脹，對唔住，你可能無飯食。保守估計，未來通脹率約2%，如果你現時預計退休後，每月生活所需開支約一萬蚊，到65歲時，屆時生活費會升到2.2萬元，你有幸或不幸還有15年命，你係65歲時，起碼要有372萬，先可維持到你到死嗰果日的理想生活。單靠強逼金，退休無憂變成退休勁憂。強逼金整體回報差，很大程度與管理費高昂有關，現時整體強逼金收費平均1.73%，12年間只減約0.27個百分點，表現及收費不掛鈎。叫受託人減價，好似欠咗佢。大家可以想像，只要每年收費降1個百分點，大家一年回報多1%，上面例子，到65歲你可滾存236萬而非185萬，增幅近三成。盈富基金（2800）每年收費0.1%，MPF恒指基金夠膽死收1%以上，請還給打工仔一個交代，點解強逼金唔可以揀盈富或iBond。強逼金乞人憎的地方，在於基金收錢是現在式，打工仔供死會是現在進行式，想攞錢是將來式，但到退休方發覺，回報是過去式。股榮