「魔童」王維基日日都計住政府仲未發免費電視牌照畀佢，今日佢經已數到去第1,024日，但政府仍然冇反應。魔童噚日話，唔知政府要保護啲咩既得利益，而家諗住向立法會議員求救，希望政府用「正常香港速度」發牌。八方估唔到一般香港人已經對立法會失去信心，魔童竟然咁破格，相信求助立法會有用。王維基次次現身，都不忘明刀明槍批評投咗共嘅CCTVB。佢話，佢間「屬於香港人」嘅電視台，派出亞洲第一隊採訪隊去咗移民樂土瓦魯阿圖拍攝名為《挑戰》嘅資訊節目，「我哋唔係去瓦魯阿圖嘅度假村，而係去活火山嘅山口攞熔岩，打破一般香港電視台唔會做嘅嘢」。