國際足協成為推廣「公平競技」、「尊重」等口號，無非都想對賽雙方，可以喺和平嘅環境比賽，不過成效就認真麻麻；我求大俠就建議，國際足協不如效法羅馬尼亞前鋒馬利卡，賽後邀請一班荷蘭兵，包括尹佩斯、阿費利等夜蒲，仲安排20名妓女「Stand by」，不過好耐以前都捲入過風化案嘅尹佩斯就坐懷不亂，早早走人！
梅度馬利卡做東
荷蘭同羅馬尼亞一齊編入世界盃歐洲賽D組，周二更加進行榜首大戰，羅馬尼亞主場1:4大敗畀荷蘭；不過輸波就冇咩影響史浩克04嘅前鋒馬利卡心情，見班荷蘭兵一場嚟到布加勒斯特，就同梅度做個好東道主，喺紅燈區一間夜總會包咗間房開派對，馬利卡原本邀請同樣效力史浩克嘅亨特拉爾同阿費利「應戰」，不過亨特拉爾可能心諗，二對二冇咩着數，就吹雞叫埋曼聯嘅尹佩斯同AC嘅尼祖迪莊幫拖。
據《Mediaset》爆料，呢個派對梗係唔會只有6個大男人參加啦，馬利卡就安排20名妓女期間出出入入，據報每位囡囡如果有下文，就要150歐元（約1,500港元），對呢班周薪都萬萬聲嘅球星，就梗係冇問題。
荷蘭兵坐懷不亂
有份參與呢場另類羅馬尼亞對荷蘭大戰嘅囡囡爆料，之前衰嘢成呎厚嘅梅度，已經當眾同一位囡囡濕吻，馬利卡同梅度就多次帶住囡囡消失人群中，隔一陣先出現番，之後馬利卡就帶其中一囡囡，食完消夜就唔見人。
不過荷蘭教練雲高爾就可以鬆一口氣，事關據班囡囡透露，尹佩斯等人都好守規矩，甚至只係畀面坐一陣就走人，然後各自返酒店休息，荷蘭軍紀都好嚴明，難怪分組賽可以4戰全勝。