政府噚日公佈2013年度非官守太平紳士遴選委員會嘅成員名單，呢單新聞表面好濕碎，但留心睇吓新成員名單，就發現當中大有文章。舊成員除咗背景後台夠硬淨嘅史美倫，其餘全部大換班。夏佳理同李業廣兩個係唐營中堅分子，固然要Out，至於中大前校長劉遵義，佢老婆麥嘉軒當日有份提名唐英年選特首，所以一樣無得留低。新加入四人包括林煥光、李國章、羅范椒芬、張震遠，擺明係梁粉天下。太平紳士只係虛銜，主要職能係巡吓羈押院或扣留中心，睇吓在囚人士有冇投訴。但係對啲地區人士同政治新秀，呢個榮譽就好有吸引力，家陣遴選委員會完全由梁粉控制，日後可以透過「分餅仔」招兵買馬，壯大狼營。