不經不覺，我在大學行走了十多年，講了數以百計的課。我非常榮幸，更是感恩，能夠結識了一班志同道合及志趣相投的好朋友。我一直以為我很「硬淨」，以為自己對教育的熱情足以燃燒整個沙漠，原來我沒有我想像中堅強！我雖是Son姐但終究是人不是神，無法力挽狂瀾，加上歲月催人，體質精力都不如前。況且人貴自知，何必苟延殘喘？我的這套做人處事價值及哲學都out了！既然不受歡迎，犧牲公餘周末休息時間不停奔波頻撲完全沒有價值，何必勉強學生苦了自己？我之所以如此心灰意興闌珊，除了學生的學習態度越來越差之外，各大學亦功不可沒！為了遷就學生，盡量令他們找不到理由不出席，學生抗拒周六上課，所以改夜晚。之不過上完一整天課還不夠累？報了名又如何？一於失蹤可也！再不就賴學校失職沒有提醒要上堂囉！反正即使新生都知大學是冇牙老虎，即使次次玩失蹤又如何？交了學費就是客，莫講冇本事趕出校，只是作出處分，畀個豹子膽大學都唔敢啦，使怕？所以大學只能投鼠忌器，萬大事以買學生怕、一切以學生happy為首要任務？
大學生常遲到 欠認真
最豈有此理的是讓一班完全不合格的大學幼稚園生去評核教授講師的教學水平！為保教席誰敢得罪爺們？只有做鵪鶉務求冇劣評。我亦曾被大學根據學生feedback要求我改變教學方法，我好歹還是義務性質，簡直是侮辱！我家住新界，講真去哪一間大學都要一段車程時間，早上10時才上課，我9時半就到，確保一切安排準備妥善。學生呢？結果大部份不是no show就是遲到。遲到的還要施施然若無其事慢慢行入課室，有些甚至連一點歉疚一句唔好意思都冇！問他們為甚麼會遲？他們的態度及答案足夠令我決定收山！「唔知醒、唔記得咗、搭遲咗班車、這種課外班遲到冇所謂、等朋友、食早餐、等搭電梯、乜原來要咁認真！」曾經有遲到半個鐘拿着三文治奶茶的，我當着校方人員面前請他走。準時到的亦錯漏百出，講明上班服裝束，結果短褲拖鞋都夠膽死。原因？「冇睇清楚電郵、唔知道要着、冇時間換！」我問他們為甚麼那麼多人報了名又不來？因為大學提供的課程實在多到氾濫，而且唔使錢網上報又很方便，報咗名先算，到時記唔記得或者想唔想去到時再算，大學又奈佢哋唔何！我到最近才突然想通了，原來一直以來只是一廂情願，這班學生就是未來的主人翁，我有何資格教主人？自己攞架來丟還聲大夾惡？真失禮！本周Son姐醒你：「玉不琢，不成器；人不學，不知義。」Son姐「Son姐」Alison張慧敏，以獵頭人身份縱橫職場幾十年，有智慧冇美貌有份量冇身材，人稱「魔鬼教練」！