今屆立會選舉，西環為保大批梁粉入局，不惜將一批合作多年、聽聽話話嘅建制派用完即棄，有被西環放棄嘅前功能組別議員同八方呻，話經過今次立會選舉一役，終於睇清楚西環嘅真面目。事緣西環選舉前，曾當面大讚呢位議員任內表現出色，聲言好支持佢爭取連任，點知轉個頭，西環就出盡陰招為佢對手拉票，手段仲極為核突，包括用政治好處「賄賂」業界內有頭有面嘅人物，係咁拎啲政協銜頭出嚟變相買票，仲誇張到唔知係咪政協位唔夠派，連去到中國邊疆位置嘅新彊、西藏政協都拎埋出嚟拉票。呢名前功能組別議員見到西環咁冇道義，到今日條氣仲頂住，所以近日有西環官員約佢食飯飲茶，佢都即時Say No，費事再聽西環廢噏，留番啲時間搵錢同湊孫好過。