國際賽賽前講過韋斯咸輸畀阿仙奴其實表現唔差，今次迎戰同級球隊修咸頓票數硬淨，戰術簡單，操作簡易，國際賽後再獲主場者，投注始終安心啲，決以單W作今輪重心。
英超4-4-2以前係品牌，不過家喺英超大老闆眼中成落伍戰術；out唔out其實睇吓你手頭上揸住乜嘢籌碼，搞到似昆士柏流浪咁四不像，冇乜資格學人講潮流。3支升班馬，修頓太有野心，今夏換入不少「國際級」球員，唔係咁易執好，尤其防線重用吉田麻也，溝通也成疑；雷丁上力中，但嫌中場4位「J字頭」球員實而不華但技術一般。反觀3隊中聯賽排名最高嘅韋斯咸，領隊「大儍」艾拿迪斯主理陣內多同聲同氣英國人，難得到利記借出極具威力嘅英式中鋒安祖卡路爾，相信今屆成就不只護級成功；計埋聯賽盃主場兩連敗，不足為據，莊家今場主W開得狠當然有因。
上仗韋軍與阿仙奴拉成均勢，只因中場指揮官、但進攻時會化身箭頭嘅隊長路蘭兩度失機，加上末段主將受傷致潰敗；今次對手係實力大削、明日之星加斯頓拉美利斯長唞嘅修頓，估計後者又會用回上屆喺英冠打keyman嘅隊長拉爾拉拿。修頓執嚟執去，點及進攻模式已定型由兩翼側擊發動，讓周中國際賽冇踢過嘅卡路爾炸散對手嘅韋斯咸。
再選，早場取倫敦打吡嘅主人家熱刺，漸入佳境兼近年主場剋住車仔，何況國際賽後效應，打早場作客一方蝕底得多，平手盤低水捧主隊安心；博冷取英冠白禮頓贏米杜士堡波膽，只要蘇格蘭射手馬卡爾史密夫確認傷癒復出，主隊放心捧場。
配適合球員打乜陣都可以踼出彩虹，冇必要跟大隊踢4-3-3。無厘頭借走卡路爾嘅利記，因波連尼受傷去到明年初都剩得阿蘇一個正規前鋒，呢位烏圭射手有乜冬瓜豆腐，利記隨時要效巴塞同西班牙國家隊打4-6-0無鋒陣；不過佢哋6個中場大概係謝四、紐尼沙軒、史達寧、舒維爾、蘇索同祖阿倫，如果真係搞到咁嘅田地，誰之錯？
(下次見報日期：23 /10)
文：蘋果波神