「政界元秋」民建聯蔣麗芸一鳴驚人，身為黨友嘅陳鑑林被搶風頭，噚日就喺內務委員會狂發膠論，話議員唔應該對狼英嘅活動說三道四，又暗踩長者唔識投票。其實鑑林嘅「左王」地位根深柢固，何必葡萄「元秋」呢？話說公民黨毛孟靜不滿狼英日前喺立法會發完言就同傳媒吹風，當然見傳媒冇錯，只係最怕狼英又選擇性吹風，影響新聞自由。鑑林即時發作話，「特首喺社會上有咩其他活動係佢個人嘅事，我覺得我哋同事唔應該喺度說三道四」。唔怪之得左派覺得狼英當選後拜會西環冇問題啦。跟住帳目委員會選舉時，連建制派都對投票方法有爭議，鑑林又發難話「大家都係經過無數次嘅投票，你唔係地區裡面嗰啲公公婆婆」。連老人家都拉埋落水，鑑林唔記得咗佢都好多長者票咩？